Na Damas Makangale - Dodoma
Taasisi ya vyombo vya habari kusini mwa Afrika - Tanzania (Misa - Tan), imetoa mafunzo ya uandishi wa habari za amani (Peace Journalism) kwa wanahabari zaidi ya 100 kutoka mikoa yote ya Tanzania bara na visiwani ili kuboresha uelewa wao kuhusu kuripoti nyakati za migogoro.
Mafunzo hayo ya siku moja yamekuja baada ya vurugu za uchaguzi mkuu wa Oktoba 29, na kuonekana ombwe ya uandishi wa habari za amani ambayo inalenga kupunguza mikwarazo ya makundi ndani ya jamii na kuleta utengamano.
Waandishi hao walikutana jijini Dodoma hivi karibuni ili kuwajengea uwezo waandishi wa habari namna ya kuripoti taarifa za vurugu , machafuko na migogoro kwa kuzingatia maadili , desturi na miiko ya uandishi wa habari.
Mafunzo hayo pia yalilenga kuwajengea uwezo waandishi kuelewa dhana ya Uandishi wa Habari za amani, aina ya uandishi unaojikita katika kuimarisha utulivu, kuzuia uchochezi, kupunguza upotoshaji, na kuandika habari zinazojikita kwenye utatuzi badala ya uchochezi.
Akifungua mafunzo hayo, Naibu Waziri wa Mambo ya Ndani. Denis Lazaro Londo, alisema waandishi wana jukumu la kulinda umoja wa kitaifa kupitia matumizi ya lugha inayojenga, utoaji wa taarifa sahihi, na kuepuka taarifa zinazoweza kuchochea migogoro, haswa nyakati za migogoro na machafuko.
Aliongeza waandishi wa habari ni daraja muhimu linalounganisha Serikali na wananchi, hivyo lazima watekeleze wajibu wao kwa uadilifu bila kuyumbishwa na mtu yeyote mwenye nia ya kuichafua tasnia hiyo.
"Tuna imani kwamba mafunzo haya yataleta tija kupitia kwenu wanahabari mliohudhuria, serikali inawahakikishia kuwa mtaendelea kuwa salama na vifaa vyenu wakati wote wa utekelezaji wa majukumu yenu." Alifafanua Londo
Amewataka wanahabari kutambua kwamba uandishi wa habari ni muhimu lakini uandishi wa habari za amani ni muhimu zaidi, zinazojikita kutunza maslahi na tunu ya Taifa na wananchi wake.
Aliongeza kwamba wizara ya mambo ya ndani iko tayari kushirikiana na wanahabari katika kulinda misingi ya utawala bora na demokrasia ili kupanua wigo wa ushirikiano kwa maslahi ya Taifa.
Alisema kwamba serikali inaendelea kuhakikisha wananchi wanapata haki ya kupata taarifa na kwamba falsafa ya 4R inalenga kulinda wanahabari na kutetea uhuru wa kujieleza akitolea mfano wa vyombo vya habari vilivyofungiwa kufunguliwa.
"Nafarijika kuwa Misa Tanzania mmekuwa mdau mwaminifu kwa serikali katika nyakati nzuri na hata ngumu. Huu ndio uzalendo tunaoutaka kutanguliza maslahi ya Taifa mbele bila kuathiri uhuru wa kitaaluma." Aliongeza
"Wizara ya mambo ya ndani inaendelea kushirikiana nanyi katika mambo yote yanayohusu usalama wa wanahabari, ulinzi wa amani na mafunzo kwa wanahabari katika kuhakikisha kwamba, tunalinda uhuru wa habari, wanahabari wanalindwa, tunatetea uhuru wa kujieleza lakini pia haki ya wananchi wetu kupata taarifa."
"Tukio la Oktoba 29,2025 ni funzo kwetu sote, sisi serikali, nyinyi wanahabari na jamii nzima kwa ujumla. Ni kweli wanahabari mnalo jukumu la kulinda amani haki utulivu na umoja wa kitaifa na tunawashukiru sana kwa kuendelea kuhamasisha amani."
Akizungumza katika mafunzo hayo, Mwenyekiti wa MISA Tanzania, Edwin Soko, alsiema vyombo vya habari nchini Tanzania havitakubali kuchonganishwa na wananchi bali vitaendelea kusimamia maadili, uzalendo na weledi katika kuripoti.
Pamoja na mambo mengine alisema kwamba waandishi wa habari ni daraja muhimu linalounganisha Serikali na wananchi, hivyo lazima watekeleze wajibu wao kwa uadilifu bila kuyumbishwa na mtu yeyote mwenye nia ya kuichafua tasnia hiyo.
“Vyombo vya habari ni nguzo kubwa ya usalama wa Taifa,” alisema Soko. “Hatutaruhusu mtu yeyote kutikisa au kuathiri misingi yetu ya uzalendo. Waandishi wa Tanzania ni wazalendo, si wasaliti”,aliongeza Soko.
Akigusia tukio la Oktoba 29, Soko alifafanua kwamba sekta ya habari iliguswa moja kwa moja, kwani baadhi ya waandishi waliumia, walipoteza wenzao na wengine kupoteza vifaa vya kazi.
Ametoa wito kwa Wizara ya Mambo ya Ndani kuendelea kulinda amani ya nchi pamoja na kuhakikisha waandishi wanakuwa salama wanapotekeleza majukumu yao ya kila siku.
Aliongeza kuwa MISA Tanzania itaendelea kutoa mafunzo ya Uandishi wa Habari wa Amani ili kujenga uwezo wa wanahabari kuandika habari zinazohamasisha amani, kushusha joto la mgogoro, kupunguza taarifa za uchochezi na kuchochea umoja na mshikamano wa kitaifa
Mhadhiri kutoka chuo kikuu cha Dar es Salaam Alex Sichona aliwasihi wanahabari kufanya uandishi wa habari unaochochea amani, kupunguza mifarakano miongoni mwa jamii na inayopunguza maumivu kwenye jamii baada ya kutokea migogoro.
“popote panapotokea mgogoro basi ni lazima mawasiliano ndio chanzo kikuu cha huo mgogoro husika lazima jamii ijue mawasiliano ni nyenzo muhimu katika kufikia maridhiano na maelewani na utengamano wa jamii husika” alisisitiza Dk Sichona.
Alisema ni vyema wanahabari wakazingatia maadili ya uandishi hususani kwenye vyombo vya habari vya mtandaoni ambavyo wengi wao wamekuwa wakiwahi kutoa taarifa (Breaking News) bila kujiridhisha ama kwa kutumia vichwa vya habari vinavyozua taharuki ili kuvutia wasomaji na wafuatiliaji wa mitandao ya kijamii.
"Uandishi wa habari wa mtandaoni na mitandao ya kijamii isitumike kukuza migogoro kwa ingawa changamoto ni kubwa katika kushughulika na uandishi wa kiraia (citizen journalism) na hii ni kutokana na ukauji wa teknolojia na mawasiliano ambayo kila mtu anaweza kufanya au kusambaza taarifa kupitia simu yake ya kiganjani,” aliongeza
Alifafanua kwamba uandishi wa habari kiraia au (Citizen Journalism) unakuwa kwa kasi na ndio mara nyingi huweka na kupata taarifa kwa haraka (Breaking News) bila kujiridhisha kutoka vyanzo vya uhakika vya utoaji wa taarifa na kuzingatia miiko na kanuni za uandishi wa habari.
Kwa upande Mhadhiri , Dkt Dotto Bulendu alisema kwamba ni muhimu kujua tabia za vijana maana ndio Kundi kubwa kwenye jamii na linakabiliana na wimbi kubwa la mwamko wa kihalaiki kutokana na msukumo wa mitandao ya kijamii duniani.
Aliongeza kwamba kuna tatizo la upotoshaji wa taarifa mkubwa (information disorder) ambayo inaanza kwenye mitandao ya kijamii hadi kwenye vyombo vya habari rasmi vya ndani na nje ya nchii.
“kwa mfano vyombo vya habari vya nje vinaripoti kwamba Rais wa Tanzania , Dkt Samia Suluhu Hassan aliapishwa kwenye kambi ya Jeshi wakati ilikuwa ni kwenye viwanja vya mashujaa hii ni upotoshaji mkubwa na mpaka sasa hakuna aliyerekibisha hiyo,” alisema
Alifafanua ni muhimu kwa kila mwandishi wa habari anatakiwa kuzingatia madhara na faida ya taarifa kabla ya kuitoa, kuangalia manufaa yake kwa jamii anayoitumika.
Post a Comment