Bank of Africa (BOA) Tanzania Yadhamiria Kuwezesha Wanawake Nchini

 Na Damas Makangale,

Bank of Africa Tanzania imekuwa mshirika wa Accelerate Women Summit 2025, mkutano uliolenga kuchochea kasi ya maendeleo ya wanawake, na imesisitiza dhamira yake ya kuwawezesha wanawake wajasiriamali nchini kwa kuwajumuisha rasmi katika mfumo wa kifedha. Benki inaamini kuwa wanawake wakiwezeshwa kibiashara wataweza kuwa wabunifu, kuibua ajira, na kuimarisha ustahimilivu wa uchumi wa nchi.

Mkurugenzi Mtendaji wa benki hiyo, Esther Maruma, amesema wanaamini kuwa mafanikio ya wanawake yanachangia maendeleo ya jamii na uchumi kwa ujumla.

 

Mkurugenzi Mtendaji wa Bank of Africa Tanzania, Esther Maruma (kushoto), akizungumza katika Mkutano wa Kuchochea Kasi ya Maendeleo ya Wanawake (Accelerate Women Summit 2025) uliofanyika hivi karibuni jijini Dar es Salaam. Pembeni yake ni Mkurugenzi wa Trademark Kanda ya Afrika Mashariki na Kati, Monica Hangi, pamoja na Mkurugenzi Mtendaji wa Kampuni ya Yono, Scolastika Kevela."

"Ushiriki wetu katika mkutano huu ni uthibitisho wa dhamira yetu ya kutengeneza fursa muhimu kwa wanawake wajasiriamali kupata rasilimali za kifedha, ushauri, na msaada wa kukuza biashara zao," alisema Esther.

 Ameongeza kuwa maadili ya msingi ya benki hiyo ni ujumuishaji, ubunifu, na kuleta mabadiliko chanya kwa kuhakikisha kuwa mbali na kuwa taasisi ya kifedha, pia wanatoa msaada wa karibu kwa wajasiriamali hadi wafanikishe malengo yao ya kibiashara.

 

Bank of Africa, Mkurugenzi mtendaji Esther cecil maruma akiwa kwenye picha na Charlene Ruto, binti wa Rais wa Kenya, william Ruto kwenye mkutano wa wanawake wiki iliyopita jijini Dar es salaam.

Benki hiyo imelenga kuondoa vikwazo vinavyowakwamisha wanawake katika kupata huduma za kifedha na kupanua biashara zao kwa kuanzisha huduma zinazokidhi mahitaji yao. Pia, benki imejipanga kuwa karibu na wanawake wajasiriamali kwa kuandaa mikutano na semina zitakazowasaidia kufanikisha maendeleo ya biashara zao.

 

Mkutano wa Accelerate Women Summit 2025, wenye kaulimbiu "Hakuna wa Kumzuia Mwanamke – Unstoppable Woman", ulilenga kuwaamsha wanawake kuchangamkia fursa zinazoweza kuwawezesha kufanikisha maendeleo yao ya kibiashara. Bank of Africa Tanzania imejidhatiti kuhamasisha mabadiliko haya kwa kushirikiana na wajasiriamali wanawake na kukuza mfumo wa kifedha jumuishi, ambapo kila mjasiriamali, bila kujali jinsia, anapowezeshwa, anapata fursa ya kufanikiwa.